تجربة على واتساب

دليل الاستعمال

من التثبيت حتى لسدّان الكاسة فالليل، كل خطوة مع الشاشة اللي غادي تشوف. باش تطبعو ولا تحفظو PDF: Ctrl + P.

شاشات البيع (الكاسة، الطاولات، الدرج) كيبانو بالعربية. شاشات التسيير والإعدادات كيبانو بالفرنسية: كنكتبو ليك السمية ديال كل زر كيف كتبان فالشاشة.

1. تثبيت الكاسة

خاصك حاسوب فيه Windows 10 ولا 11 (64 bits). شاشة باللمس، طابعة التيكيات (58 ولا 80 ملم)، درج الفلوس وقارئ الباركود مزيانين، ولكن الكاسة كتخدم بلا بيهم.

  1. نزّل البرنامج من هنا: dabacaisse.ma/telecharger.
  2. حل الملف DabaCaisse-Setup. التثبيت كيدار بوحدو وكيحط الإيقونة ديال DabaCaisse فالبورو.
  3. إلا بان ليك ميساج ديال Windows «Windows a protégé votre ordinateur»، ورك على Informations complémentaires ومن بعد Exécuter quand même.

2. أول تشغيل

أول مرة، مساعد التثبيت كيدّيك ف5 خطوات. كلشي كيتبدل من بعد فالتسيير.

مساعد التثبيت: اختيار اللغة ديال الكاسة، الفرنسية ولا العربية
  1. اللغة: اختار العربية باش تبان ليك الكاسة بالعربية. وتقدر تجرب قبل بـEssayer la démo: محل وهمي باش تتدرب، ومن بعد كتمسحو.
  2. المحل ديالك: اختار شنو كتبيع (حانوت، سناك، مطعم، قهوة؛ تقدر تختار بزاف)، ومن بعد السمية، التيليفون والعنوان اللي كيتطبعو فالتيكي. فالقهوة والمطعم كتكتب حتى عدد الطاولات.
خطوة المحل: نوع قهوة مختار، السمية، التيليفون والعنوان
  1. مول المحل: السمية ديالك والرمز السري ديالك (من 4 حتى 6 أرقام). هاد الرمز كيحل كلشي: ما تعطيهش للخدامة، غادي تصاوب لكل واحد الرمز ديالو.
  2. السلعة ديالك: كتبان ليك لائحة ديال السلعة المعروفة. حيد العلامة على اللي ما كتبيعش وصلّح الأثمنة.
لائحة السلعة ديال القهوة مع الأثمنة اللي خاصها تتصلح
  1. الطابعة: ريزو (كابل) ولا USB. تقدر تديرها من بعد؛ بلا طابعة، التيكي كيبان فالشاشة.

3. تفعيل الاشتراك

ف14 يوم ديال التجربة، كلشي خدام ولكن التيكيات مكتوب فيهم DÉMO. ملي كتشري، كيوصلك كود التفعيل فواتساب.

  1. حل التسيير ← Paramètres ← Abonnement et cloud.
  2. لصق الكود (كيبدا بـ CP-) وورك على Activer. خاص الأنترنيت شي ثواني.
الإعدادات: التحديثات، النسخ الاحتياطية وتفعيل الاشتراك

ما كاينش الأنترنيت فهاد البيسي؟ ورك على Pas d'internet sur ce PC ?: الكاسة كتعطيك الرقم ديالها (POS-…). صيفطو لينا فواتساب، ونرجعو ليك كود تلصقو فنفس البلاصة.

الكاسة كتتحقق من الاشتراك ملي كيكون الأنترنيت. تقدر تبقى حتى 15 يوم بلا أنترنيت؛ من بعد، وصلها بالأنترنيت شي ثواني.

4. حلان الكاسة فالصباح

  1. دخّل الرمز السري ديالك.
  2. كتب رصيد البداية: الفلوس اللي حطيتي فالدرج باش ترد الصرف. ورك على فتح الصندوق.
فتح الصندوق: كتابة رصيد البداية

كل خدام كيحل الكاسة بالرمز ديالو: هكا كتعرف شكون باع شنو.

5. البيع والخلاص

سلعة بالكيلو: الوزن 0,75 كيلو والثمن محسوب

ورك على الدفع (ولا F12)، ومن بعد اختار كيفاش غادي يخلص:

الخلاص نقدًا: ورقة 50 درهم والصرف اللي خاصو يترد

ورك على تأكيد. التيكي كيتطبع، وفالنقدًا الدرج كيتحل. التيكي اللي تسجل ما كيتبدلش: إلا كان شي غلط، حل السجل، اختار التيكي وورك على إلغاء (إرجاع) (غير للمسير).

البيعة تسجلات: الصرف والتيكي مطبوع

6. القهوة والمطعم: الطاولات

فالقهوة ولا المطعم، الكاسة كتحل على تصميم الطاولات. ورك على طاولة، ومن بعد على اللي طلبو. لكليان واقف فالكونطوار، ورك على بيع مباشر.

تصميم الطاولات ديال القهوة: الطاولات العامرة والخاوية وزر بيع مباشر
الطلب ديال الطاولة T3: جوج نص نص وأتاي بالنعناع غادي يمشيو للبار

7. الكريدي

لكليان غادي يخلص من بعد: فالدفع، اختار كريدي، ومن بعد اختار الزبون (الكريدي). قلّب عليه بالسمية ولا التيليفون، ولا زيدو بـزبون جديد.

الخلاص بالكريدي: زر اختيار الزبون

الحساب ديال كل كليان كاين فالتسيير ← Clients kridi: الدفعات، كشف الحساب للطباعة، وميساج التذكير واجد يتصيفط فواتساب. السقف ديال كل كليان كيتحط ملي كتزيدو؛ تفوتو كيتطلب الرمز ديال المسير.

8. الخدامة والرموز ديالهم

فالتسيير ← Utilisateurs، زيد كل خدام بالسمية ديالو والرمز السري ديالو. اختار نقطة البداية (Gérant مسير، Caissier كاسيي، Serveur سرباي)، ومن بعد علّم بالضبط شنو عندو الحق يدير: التخفيض، الإلغاء، سدّان الكاسة، الواي فاي، السلعة…

المستعملين: لائحة الحسابات والفورمير ديال الزيادة مع الصلاحيات

9. اللوغو، الواي فاي، الطابعة، النسخ الاحتياطية

كلشي كيتدار فالتسيير ← Paramètres، ومن بعد Enregistrer الفوق على اليمين.

الإعدادات: الواي فاي ديال الكليان واللوغو ديال المحل

10. آخر النهار: سدّان الكاسة

فالنهار، الدرج ← تقرير X كيوريك البيعات بلا ما تسد الكاسة. نفس القائمة فيها دخول وخروج الفلوس (صرف زدتيه، مصروف خلصتيه)، ديما مع السبب.

قائمة الدرج: تقرير X، إدخال وإخراج النقود، الواي فاي، إغلاق الصندوق

فالليل، ورك على الدرج ← إغلاق الصندوق (Z):

  1. حسب كاع الفلوس اللي فالدرج، معاها رصيد البداية.
  2. كتب شحال من ورقة وشحال من بياسة من كل قيمة.
  3. ورك على إغلاق نهائي. تقرير Z كيتطبع فيه البيعات، الضريبة (TVA) والفرق بين الفلوس اللي خاصها تكون والفلوس اللي حسبتي.
إغلاق الصندوق: حساب الأوراق والبياسات
تقرير Z: البيعات، الخلاص، الضريبة، النقود المتوقعة والمعدودة، الفرق صفر

باش تشوف التفاصيل ديال أي نهار (كل سلعة تباعت، كل خدام، كل ساعة، الكريدي، المصاريف): التسيير ← Rapports ← Rapport du jour détaillé، ومن بعد Imprimer le rapport.

التقرير المفصل ديال النهار: رقم المعاملات، التيكيات، المعدل، الربح، الأصناف

11. إلا وقع شي مشكل

«بزاف ديال المحاولات»
من بعد 5 رموز غالطين، الكاسة كتبلوكا شوية، وكل مرة كتطول. تسنى، ومن بعد دخّل الرمز الصحيح.
مول المحل نسا الرمز ديالو
فشاشة الدخول، ورك على نسيت رمز المالك. صيفط لينا رقم الكاسة فواتساب: من بعد ما نتأكدو بلي نتا مول المحل، كنصيفطو ليك كود صالح يومين، مرة وحدة. لصقو واختار الرمز الجديد ديالك.
التيكي ما كيتطبعش
شوف واش الطابعة شاعلة، موصولة وفيها الورق، ومن بعد التسيير ← Paramètres ← Imprimer un test. التيكي كيبقى فالشاشة: البيعة تسجلات.
التيكيات مكتوب فيهم «DÉMO»
الكاسة فالتجربة: فعّلها بالكود ديالك (الجزء 3).
«وصلها بالأنترنيت شي ثواني»
الكاسة ما شافتش الأنترنيت هادي 15 يوم. وصلها (ولا شارك الكونيكسيون ديال التيليفون) دقيقة.
بغيت نبدل الحاسوب
دير نسخة فالكلي USB، ثبت DabaCaisse فالحاسوب الجديد، ومن بعد كتب لينا فواتساب: كننقلو ليك الاشتراك.
نسيت رمز المالك: رقم الكاسة وكود إعادة التعيين

عندك سؤال؟ كتب لينا فواتساب (07 66 27 88 90)، بالدارجة ولا بالفرنسية.